Derioko Kokapena

Deriok Mungia eta Laukarizeko lurrak ditu iparraldeko mugan, Zamudio ekialdean, Bilbo hegoaldean eta Sondika eta Loiu mendebaldean. Luzera- eta latitude-koordenatu geografiko hauek ditu: 43°17'28.9"I (North) eta 2°53'13.1"M (West), edo formatu dezimalean: 43,291354 eta -2,886961. 

Altitude eskaseko muinoak ditu inguruan, eta Mantuliz (259m), Iperramendi (200m), Avril (386m) eta Untza (214m) mendietan iristen dira gorenera. Azken horretan jaiotzen da Untzaga erreka, Aiartzarekin batera urak Asua ibaian isurtzen dituena.

Eustaten 2017ko datu ofizialen arabera, Deriok 10,14 kilometro koadroko (1.014 hektarea) hedadura du, ia-ia 6.301 biztanle ditu, eta kilometro koadroko 624 biztanleko dentsitatea du. Udalerrian dauden enpresa ugariei esker, Txorierri bailarako biztanlegune handiena bihurtu da.

Errepide bidez komunikazio oso onak ditugu: batetik, Bi-631 autobiaren bidez Mungiarekin eta Bizkaiko ekialdeko kostaldearekin lotura dugu; bestetik, Txorierriko korridoreak, N-637 errepideak, Bilboko hegoaldera eta Nerbioi itsasadarraren eskuin nahiz ezkerraldera darama norako batean, eta Donostiara beste norakoan, Erletxes parean A8 autobidearekin lotuz.

Garraiobide publikoari dagokionez, Bizkaibus autobus-zerbitzuak Bilborekin lotzen du Derio, baita gertu dauden eta/edo garrantzitsuak diren beste gune batzuekin ere (EHU/UPV, Gurutzetako Ospitalea, Bizkaiko Parke Teknologikoa...). Eusko Trenbideak Lezama-Bilbao linea eskaintzen du, duela gutxi Bilboko metroaren 3. linearekin lotu dena.

Gainera, autobiaz, Bilboko aireportua (BIO) 5 kilometrora dago soilik, eta nazioarteko lotura ugari ditu.