Albisteak eta iragarkiak

 
  • Udalak 600 euroko laguntza emango dio oinarrietako baldintzak betetzen dituen eskatzaile bakoitzari. Eskaerak maiatzaren 5etik aurrera tramitatu ahal izango dira, Udalaren web orriko egoitza elektronikoaren bidez
  • Aurkezteko epea dekretua Bizkaiko Aldizkari Ofizialean argitaratu eta 7 egunera bukatuko da.
  • Laguntzak halaber, etetera behartuta ez dauden arren, bere irabaziak % 75 murriztu direla egiaztatzen duten establezimenduei zuzenduta ere badaude.
  • Kontsumoa sustatzeko bonoen kanpaina bat ere abiaraziko da. 30 euroko 1.500 bonu jaulkiko dira, guztira 45.000 euroko injekzioa eginez.

Derioko Udalak koronabirusaren krisiak eta Alarma Estatuaren adierazpenak behartuta jarduera utzi duten udalerriko merkataritza, ostalaritza eta zerbitzu indibidualizatuen autonomoei laguntzeko neurri sorta bat onartu du. Udalak 150.000 euroko aparteko funts ekonomikoa sortu du sektorea suspertzeko. Gobernu taldeak bilerak egin ditu merkataritza eta ostalaritza elkarteetako arduradunekin eta Udaleko alderdi politikoetako bozeramaileekin, lantzen ari diren neurrien berri emateko.

“Merkataritzak eta ostalaritzak oso sektore aktiboa direla erakutsi dute azken urteotan, Deriori bizia ematen dioten funtsezko motorrak. Eta zoritxarrez, COVID-19ak gehien kaltetzen dituen kolektiboen artean daude. Hori dela eta, Udalak haiekin borrokatu nahi du, inpaktua arintzeko eta epe ertainera sektorea suspertzen lagunduko duten ekimenak ezartzeko elkarrekin lan egin, inor atzean gera ez dadin. Eta, jakina, lanean jarraituko dugu beraien egoera arintzeko neurri edo plan gehiago abian jartzeko", adierazi du Esther Apraiz Derioko alkateak.

Programa honen bidez, Udalak 600 euroko laguntza emango dio oinarrietako baldintzak betetzen dituen eskatzaile bakoitzari. Maiatzaren 5etik aurrera eskatu ahal izango dira, Udalaren web orriko egoitza elektronikoaren bidez.Eskabideak aurkezteko epea dekretua Bizkaiko Aldizkari Ofizialean argitaratu eta 7 egunera bukatuko da. Laguntzak lokala ixteko nahitaezko aldian sortutako mantentze gastu zehatzak estaltzeko izango dira: hornidura, makinak, instalazioak eta jarduerari zuzenean atxikitako ekipoak mantentzeko gastuak, errentamendu gastuak beste erakunde batzuetatik jaso ez direnean, jardueraren hornitzaileei mugaeguneratutako ordainketak…

Nabarmendu behar da laguntzak, halaber, etetera behartuta ez dauden arren, irabaziak % 75 murriztu direla egiaztatzen duten establezimenduei zuzenduta daudela.

Programa honi forma ematen dion dekretua Bizkaiko Aldizkari Ofizialean argitaratu behar da datozen egunetan. Une horretatik aurrera, interesdun guztiek eskabideak aurkezteko epea irekiko da. Udalak epe hori eta eskaerak aurkezteko bideak jakinaraziko ditu bere web orriaren eta sare sozialen bidez.

Dinamizazio kanpainak

Behin establezimenduak irekitzen direnean, Udalak hainbat kanpaina jarriko ditu martxan kontsumoa dinamizatu eta sustatzeko. Zentzu honetan, kontsumo bonuaren kanpaina bat abian jartzeko lanean ari dira. 30 euroko 1.500 bonu jaulkiko dira, guztira 45.000 euroko injekzioa eginez. Bonu bakoitzaren erosketa kostua 20 eurokoa izango da, eta eramaileari 30 euroko balioa emango dio, Udalak egingo duen 10 euroko ekarpenari esker.

Gogoratu behar da, halaber, Udalak 11.400 euroko diru laguntza onartu duela aurten Danerik Paraje merkatarien elkartearentzat, App-web (on-line salmenta) martxan jartzeko. Merkataritzari, ostalaritzari eta autonomoei zuzeneko diru laguntzak emateko programa hau Derioko Udalak kolektibo horiei laguntzeko martxan jarriko duen lehen neurria da. Hurrengo hilabeteetan, jarduerari berriro ekiten diotenean, jarduketa eta neurri berriak antolatzeko aukera aztertuko da.

 COVID-19 laguntzak eskatzeko inprimakia (PDF 113KB)

 Oinarriak (PDF 1.15MB)

 Onartutako eta ukatutako laguntzak (PDF 234KB)